Putao ginwang, Hkawnglang Fu ginra kata na ခလရ (137) ၊ ခလရ (280) hte ginra Pyithusit ni dap jung shara jahkrat nga ai Jarit shadaw 30 Amat Paw Helicopter nbungli pa shara hpe KIA hpyen hpung ni September (18) ya shani gasat zing la lu sai lam na chye lu ai.
Ndai ya zing la lu ai စစ်ေကာ်မရှင် dap shara gaw mawdaw lam nga ai raitim lanam ta hta n mai hkawm ai majaw hkyak hkyak ra wa yang Helicopter nbungli hte malu masha hpyen lang arung arai ni htaw sa jaw ra ai shara langai mi rai nga ai.
Helicopter nbungli dingyang n lu sa ai re majaw dai ginra na mungmare masha ni Hkawnglang Fu kaw nna nhtoi manga ya kru ya lit gun lagaw lam hkawm nna malu masha machyu pala sa jaw ai lam galaw ai shara mung re.
KIA hpyen hpung ni zing la lu ai nbungli pa shimlam dap shara ni hpe bai htim gasat la lu na matu စစ်ေကာ်မရှင် dap hte Pyithusit ni Putao mare kaba kata hte Machang Baw mare hkan na ramma ni hpe Pyithusit n shang n mai masha rim lahkawn nga ai hte lit gun sa masha n sa n mai shaga lahkawn nga ai majaw buga masha ni hte ga li ga law hpai shai hkat ai mabyin byin nga lam buga masha ni tsun shana ma ai.
Pyithusit n kam galaw ai ramma ni gaw dai ginra kaw nna hprawng koi yen mat ai lam hte lit gun portal n kam sa ai ni hpe ginra uphkang salang ni kaw nna nta htinggaw mi 50,000 ks hta lahkawn la ai lam mung galaw nga ai lam na chye lu ai.
Ndai gasat poi byin nga ai shara de lit gun sa na mungshawa hpung mi Hkawnglang Fu kaw nna September (22) ya shani rawt sa na re lam ginra masha ni tsun ai kaw na na chye lu ai.
Htingbu mungdan de pru shang matut mahkai ai Jarit shadaw Masat (30) shara na စစ်ေကာ်မရှင် dap hte Pyithusit dap ni hpe KIA hpyen hpung ni kaw nna lai wa sai July shata (17) ya shani zepzi gasat zing la sai rai nga ai.
KIO gaw ndai Hkawnglang Fu, Nmai Hka Hku ginra hta lai wa sai 1997 ning kaw nna Buga Gaw Sharawt bungli galaw nga sai shara raitimung hpyen masa a majaw hkawm sa hkawm wa matut mahkai yak nna bungli gan hkring ai laman Pyithusit hpyen hpung hte Myen hpyen dap ni ka-up la da ai shara re lam KIO salang ni tsun ma ai.