Wunpawng Mungdan Shanglawt Hpyen Dap KIA Masat (2) Dap Ba, Masat (43) Dap Nawng Dap Dung ginra, Laksan Danai ginwang daw Nam Hpyek hte Kawng Ra mare lapran Yuzana lam masat (40) kaw October (4) ya jahpawt hkying (8:40) aten daram hta Myen hpyen gumshem dap ni hte Wunpawng mungdan shanglawt hpyen dap KIA ni gasat gala byin ai lam nga ai.
Hpyen n-gun (70) daram lawm ai Myen hpyen gumshem dap Hk.M.Y (390) hpung ni dai ginra mayan hpyen shamu shamawt shang wa ai majaw KIA hpyen hpung ni shingla gasat dat ai kawn Minutes (20) daram gasat gala byin ai re lam na chye lu ai.
Dai shani hta sha Myen hpyen gumshem dap Hk.M.Y (389) hpung ngu maram lu ai n-gun (100) daram re ai hpyen hpung ni hpe mung hkying (10:30) aten daram hta Hkawng Lo Hka hte Jam Bu Bum lapran Hking Gaw Hka kaw KIA hpyen hpung ni hkap shing la gasat ai kawn Minutes (15) daram gasat gala byin ai lam na chye lu ai.
Myen hpyen gumshem dap ni lai wa sai September shata kaw nna Danai Lido lam mayan hku hpyen n-gun jat htu shadut ai lam, hpyen lang rung rai htaw shalai nga ai lam ni dingyang galaw nga ai sha n-ga mungshawa ni nga ai mare kata de laknak kaba gap bang ai lam, lai wa lai sa mungshawa ni hpe azin ayang sawk jep ai lam dingyang galaw nga ai lam na chye lu ai.