Jinghpaw Wunpawng Amyu Sha Ni A Ma Jahtawng Htu Ai Lam

Ma Shahtawng Htu Sha Ningnan Hpang Ai Lam

Wa Hpung Wa Gam Mawn ngu ai wa.. Wa Sa Salang tai ya ai, Chyalai Wa Sa Salang ginngat ai, ngu ai gaw Shinggyim mashang; masha ni hpe, garai n chye garai n kung yang, hpa baw magam bungli lamang ni galaw ra ai ngu, tsun hkrai dan ai hpe tsun ai rai nga ai.

Ji goi e nang gaw kadai rai sindai? Ngai gaw hpun Chyalai ninghpang ginshat, Wa sa salang re. Ya gaw Ginru Ginsa mung  Chying ring sai mu, myi hpaw sai chye mat sai. Nhtu dup mu…Nta gap mu ngu sai. Ji goi e.. nta dingshawn shang wa mu.. yi hkyen ram sai. Yi hkyen mu..nmut mangai ngai jang,mam ningnan sha mu…

Ji goi e..ma hkum rai sai law…Kaning di na i? E… shu goi ni e yi du.. yi baw kaw hkai tu ai Shanam gawt gun la mu.. Mam dum de gun tawn da mu.. Nga” Nga” chyang sa hkwi la mu… Jahkaw di tawn da mu.. … ya ma shangai sai… Ma jahtawng htu ya mu … shaman ga tsun nna htu mu…

Shanam htu hta, Nga” Chyang shan jahkraw hte jahtawng htu mu, Nmu mana, ga ga ai myit n su ai masha ni hpe hkum htu shangun mu. Myitsu tsawm htap, zet let ai htau li htaula , lawan ladan re ai, myit su ai masha ni hpe htu shangun mu; ngu nna tsun dan mu ai da. La kasha shangai jang, myit su ai mayat maya ai Ma kawa ni hpe htu shangun mu. Num kasha shangai jang,mayat maya ai , myit su ai ma kanu ni hpe htu shangun mu.

Kaji kawoi,kanu kawa ni a shaman matan ga ni tsun ya let, htu ya ai. Ya daini na aten du hkra, jiwa ni hkinghtawng lailen ni hpe anhte chyurum ai Jinghpaw Wunpawng amyu sha ni gaw, lahta na ga matsun laida.. lailen ni hte maren galaw nga ga ai.

Moi bum shagawng ga de nga lai wa sai ni gaw, myitsu ai ma kanu, myit su ai ma kawa, mayat maya ai ni hpe, law malawng shaga nna, ma jahtawng htu ya shangun ma ai.

Ma Shangai Ai Shaloi Shaman Kapaw Ai Lam

Ji wa ni gaw, Ma shangai ai hte Shaman kapaw ya ma ai. La kasha shangai jang manga (5) lang kapaw ya ai. Num kasha shangai jang Mali (4) lang kapaw ya ai. La kasha, Num kasha shangai ai hpe Shaman kapaw na ai hte htingbu dingpyen ni yawng chye sai.

Ma shangai na kan machyi ai masha nga jang, nta npan maga maga de kawa pali sumri kang da ai. Nbang maga mung kang da ai.Manam n shang na matu masha lagaw katsi n kabye na matu re ai.

(Ma shangai loi na matu)

Ma shangai ai 2,3 ya rai jang ma gan tsan ai, ninghtoi shapraw ya ai nga nna nat moi(nat jaw) ya ma ai. Ya prat hta gaw, akyu hpyi nna jasan jaseng ya nga ga ai. Nat jaw ai. Nat moi, u wa ju sha,dai shani hka shin jasan jaseng ya ai. Ma chyangai kanu gaw, wan nhtaw kaw bakang tsupni mara nat nna hpang kaw hkan nang ai. Kawa gaw shawng de, ndan gap ya ai. Kawa lahpaw raitim gap ya ma ai. Shawng de lapai lahkra de gap ya ai. N kaja ai baw nga jang hkrit nna yawng hprawng yen u ga ngu ai lachyum re.

Ma hpe bu hkawm sharin ya ai nga nna, mayu ga de kani katsa ni a nta de ma madun sa ai. Htunghking shat magun lit hte hpawn gun sa ai mayu ni kani katsa ni gaw, Ma hpe kumhpa lama ma jaw ma ai. Shaman ga ni hte hpawn, galu kaba mayat maya law htam ngwi pyaw hkam kaja sut su nga mu ga law… shaman ya dat ma ai.shagrau kumhpa gaw la kasha hpe rai jang (Bau) shing nrai gumhpraw ninggang soi nhpye, Ningri langai ngai kumhpa jaw ma ai.

Num kasha ni hpe rai jang, gumhpraw lahkawn, pat na kan, ja na kan, ja kachyi langai ngai shagrau kumhpa jaw ai. Tinang a kashu kahkri ni hpe shakawn shagrau ai lam ni re. Tsawra myit madun hkat ai lam rai nga ai. “Ma Bu hkawm sharin woi sa ai shaloi bau kumhpa mai jaw ai. Kaji ai wunli wun-gau, htunghking lailen ni rai nga mali ai law.. Ya dai ni anhte a prat hta grau nna, hkrik hkam ai hku galaw na grau mai nga ai.

Ma Jahtawng Htu Ai Lam

Moi shawng de chyaloi nhkoi prat kaw nna,Jiwoi Jiwa ni chyurum ai Jinghpaw Wunpawng amyusha ni gaw, Jaw labau gun let yu hkrat nga pra hkrat sa wa ai ni rai nga ai. Ma hkum shata (3,4) rai jang Ma kan hpe Nat moi ya ma ai. Ma shangai Ma ba sai hte nat moi ya rai nna kaja ai wunli la ma ai. Ya anhte Hkristan ni raitim, ma hkum rai jang akyu hpyi ya ai, ma shangai jang kabu ai hte wunli la akyu hpyi poi galaw ya rai chye nga ga ai.

Kaji kawoi ni a jaw prat latsa kaw nna, ma shangai daidaw la ai shaloi, nta kaw na kawa kumhtung ahprep la nna kawa shinggren hte Ma shadai hpe kadoi ya ai. shadai lup ai shaloi mung, la sha ni hpe gaw, ka-ang dawhpum shadaw pawt kaw lup ya ai. Num kasha ni hpe gaw, Sharem shadaw pawt kaw lup ya ai. shadai lup ai shaloi mung, gau ngwi di nna abwi sha hta  lup ya ra ai. Majoi hkrup mara kabai lup jang ma kajawng ai nga nna myitsu salang ni tsun ma ai. Kawa chyen mazi shit la nna ding ding jun kum ya ra ai. Ran ran di nna jun ya yang, wa n tsawm ai, wa ran ran rai nna, wa tu n tsawm ai nga ma ai.

Ma shangai ai hte ma mying hpe lawan wan shamying ya ra ai. Nat ni shawng shamying ya na hkrit tsang ma ai. Nat ni shawng mying shamying la jang, n kaja ai nga ma ai.

Shangai ai hte ma mying hpe shamying la nna, ma jahtawng htu ya chye nga ga ai. Htunghking ni hpe galaw chye ga ai. Grai mayat maya ai ma kanu, ma kawa myit su ai, kaja ai htu nen ai masha ni hpe lata nna ma shangai, ma jahtawng shanam htu shangun chye ma ai. Ma hkum rai sai kaw nna, hkyen lajang da ai lam ni galaw chye nga ga ai. Moi prat gaw Ma shangai jang lang na matu, Kawa kaba ndum lahkawng hpe mung, ma hka shin lang na matu jau jau daw da ma ai. Ma nbat, sumdaw ni hpe mung da tawn da ma ai.

Ma jahtawng htu sha jang, lang na matu Jum, Shanam ni hte Nga jahkraw ni hpe kyem da chye ma ai. Ngahpyin, Ngadi, ngalai, ngatsang shan ni hpe law malawng lang ma ai. Ngai jahkraw hpe lahpaw jahkraw hte kayawp nna Makai nhtawm sharem lapa kaw shakap da ma ai.

Ma hpe shangai daidaw la ai shani mare shawa masha htingbu htingpyen rau dung rau nga yawng hpe  shaga la nna, kabu gara hte sa dam  nhtawm, Ma jahtawng htu sha let, shaman ga, Mang gala ga ni tsun ya ma ai. Ma jahtawng shanam sha htu, shat nbaw sha, Chyanun tsa hpunglum ni pyi lu rai nna ma shangai ai shani grai kabu pyaw chye nga ga ai.

 

Nga Shahkraw Hte Ma Jahtawng Htu Ai Lam.

Nga shan hte ma jahtawng htu ai lachyum gaw, Nga gaw grai mayat maya ai, Nga di ni mung mun mun sen sen rawng nga ai. Nga ni gaw Uhpung uhpawng hte kanawng kayawt hkawm, myit grai hkrum ai hku nga chye ma ai. Dai zawn re ai kaja ai lam kaja ai kasi ni hpe yu la nna wunli la mayat maya law htam nga u-ga ngu ai lachyum ni hpe sharing manu shadan let Nga shan hte ma jahtawng htu ai lam rai nga ai.

Sinwa U Hte Jahtawng Htu Ai Lam

Sinwa u shan hte  mung ma shahtawng htu ya chye ga ai. Sinwa u shan hte ma jahtawng htu ai gaw, Sinwa u gaw u amyu numji numjoi yawng hkum shumhpa u amyu ni hpe woi awn lakawn chye ai. U manang ni sha hpa tam jaw ai U hkawhkam langai mi rai nga ai.

Mahku nsen mung grai pyaw ai u amyu langai mi rai nga ai. Yawng na ra na ga shaga chye ai. “ Oi Lik, Oi Lik, Oi ya” nga grai shaga pyaw ai. U ni yawng na ra ma ai. Myit kaja ai , tsun shaga chye ai. Uhpung uhpawng yawng hpe, woi awn singgawn lu ai majaw, kaja ai katsi ni hpe la nna Sinwa u shan hte  ma jahtawng htu ya ai lam rai nga ai.

Sinwa u hpe kasi kaja la ai majaw, masha mying hpe mung anhte Jinghpaw Wunpawng sha ni Zau Sinwa mying ni hpe shamying ya nga ga ai. Anhte Cyurum amyu ni gaw, Sinwa Naw, Sinwa Zau , Sinwa Li, Zau Seng, Zau Mai, Zau Doi, Zau Ding,Zau Dan,Zau HKawng,Zau Raw, Zau La, Zau Tu, Zau Tawng,Zau Sam nga nna Jiwa ni shingteng shaga mying shamying ya ai gaw Sinwa U Lanung Sinwa a kasi la mai ai majaw rai nga ai.

Ya anhte maram yu lu ai mung, Zau Sinwa mying ai ni gaw grai magrau grang myitsu ai manaw manang law law hpe zinlum singgawn ai myit sumnung shingdi ai, ningbaw ningla kaja mung byin nga ai. Hpaga ga tim awng ai, mungkan hta kaga amyu ni Zau Sinwa mying shamying ai lam nna lu ai.Anhte amyu ni sha Sinwa u shan ni hte ma jahtawng htu ya ai hte Zau Sinwa mying shamying ai lam rai nga ai.

Ura U Shan Hte Jahtawng Htu Ai Lam.

Ura U, NingAwn Naw u shan hte mung, ma jahtawng htu sha chye ga ai. Ura u gaw u ni hpunsi sha ai manau dum ai shaloi mung joiwa shapyaw ya ai nga ma ai. U ni manau joiwa kaba mung rai nga ai. U ni shawng manau dum ai hpe yu la nna Ma Ding Yau shawng manau joiwa ai nga ma ai. Gat Rai hpun si, Gat Byen hpun si, Gat noi si, Gat gu si hpun ni hta Ura ni, gayawt pyaw manau dum let hpun si hpe di sha pyaw nga ma ai. Ura shaga ai nsen gaw, Hka pyi Makai lu na daram pyaw nga ai. Hpun  si sha nga ai u amyu baw sumhpa ni hpe mahku grai pyaw ai hku shangwi shapyaw ya lu ai u amyu rai nga ai.

Mahku grai pyaw hkra ningchyin chye ai majaw, kasi la mai ai. Yungwi shayi shadang sha ni law law paw pru wa u ga, wunli wungau la mai ai U amyu rai nga ai. Tsawm mung grai tsawm ai. Mahku mung grai pyaw let, kanawn, shamawt, shamu grai chye ai re majaw, Ma mying shamying ai kaw mung lang ga ai. Ura Naw, ngu nna mying shamying ai mung law law nga ai. Jiwa ni ginlen lang ai re lam chye lu ai.

U Krang Naw Shan Hte Shahtawng Htu Ai Lam

U Krang Naw u gaw, sum-up, shadawng, sumwum kata kaw rawng nga nna, hkum tsumhpa nga ga chyoi nna shaga rawng nga ai hpe na lu mu lu ga ai. “ U Krang Naw shan hte jahtawng htu ai, rum hpang (7) ya myiman mu ai ngu “ ai ningchyin ga ni mung nga ai. U Krang Naw shan hte mung ma jahtawng htu sha nga ga ai. Rum hpang (7) ya shani shangai ni ma gaw laklai zet ai hpe mu lu ai.

U Krang Naw u gaw, U amyu ni hta laklai ai atsam lu nga ai U amyu re. Zet tsang ai lale lawan,larau ladau , htauli htaula re ai u amyu langai mi rai nga ai. U Krang Naw gaw, sumwum kata kaw yu jang gaw n mu lu, gaw grai ga chyoi ai, chyaukyi chyaukang nga chye ai U krang Naw, ding yau rai nga ai. Dai majaw kaja ai , zet ai, ga kung ai, amyu ni a ga ni hpe shalai chye ai. Peng Hkawa u zawn chye shaga ai. “Pawp jut, Pawp jut” nga chye ai. “Wang gaw wang gawt” nga shaga chye ai. “Dep lep ting ring” nga chye ai. Shingkai tang zawn shaga chye ai. U ni yawng a ga hpe shaga shalai ya chye ai majaw, Ma ni mung dai zawn kung zet u ga ngu nna kasi la mai ai majaw ma jahtawng htu sha ai shaloi, U Krang Naw ding-yau shan hte mung ma jahtawng htu sha ai lam rai nga ai.

 

Sharaw Shan Hte Ma Jahtawng Htu Ai Lam

Anhte Jinghpaw Wunpawng amyu sha ni nkau mi gaw Sharaw shan hte mung ma jahtawng htu sha chye ga ai. Sharaw gaw ning gun grai ja ai. Hkrit na zawn re ai Dusat dumyeng langai mi rai nga ai. Dusat hkawhkam langai re ngu tim n shut nga ai.

Mungkan masha ni anhte a sinpraw sinna de nga ai ni hpe, nsen shapoi lamang hku na lu mai ai. Magrau gang ai lahkawng hpe shingdaw yu nga ma ai. Sharaw gaw sam tsang ai,zet let ai amyu rai nga ai. Sharaw shan hte ma jahtawng htu ya ai ma gaw, grai n-gun atsam rawng nga ai. Myit htauli htaula rawng ai, Hpyenla galaw tim masin ja ai.Sharaw a myit masin hte bung nna majan gasat ai hta grai magrau grang ai. Hpa baw bungli ni hta mung dut dang ai lam  n nga ai. Sharaw a magrau gang ai kasi ni hpe yu la nna kaja ai, kung zet ai amyu re ngu nna wunli wun gau la ai lam rai nga ai.

Sharaw gaw Lana mi kahtawng (9) hproi hkra hkawm lu ai nga nna myitsu salang ni tsun chye ma ai. Sharaw a magrau grang ai atsam ni hpe yu la, katsi la nna, ma jahtawng htu sha, ma shangai daidaw ai shani sharaw shan hpe mung akyu jashawn ai lam rai nga ai.

Ma Jahtawng Htu Ai Shaloi Shanam Bang Ai Lam

Shanam hpe ma jahtawng htu sha ai shaloi bang ai gaw sha mu namchyim rawng na matu bang ai mung rai nga ai. Shanam hpe kai dau langai hkai jang lamyi laman law law tu wa ai, mayat maya ai, law htam wa ai katsi la mai ai majaw bang ai lam rai nga ai.

 Jinghpaw Wunpawng Myu Sha Ni Ma Mying Shamying Ai Lam

Lungseng

Lungseng hpe mung masha mying shamying ya chye ma ai. Anhte a kaji kawa ni a prat shanat kaw nna kaja ai lam ni hpe shadawn maram yu nna, masha  a mying ni hpe shamying ya nga ma ai. Lungseng hte mying shamying ai mung, anhte Jinghpaw amyu ni hta jan nna, muungkan mungdan kaga ni hpe n na yu ga ai. Anhte amyu ni sha lungseng hte mying shamying ga ai. Kaga reng ai (Tsi, Ja, Padi,Mya) ni hte shamying ai hpe na yu ga ai.

Pat Mying Shamying Ai Lam

Anhte Jinghpaw mungdaw hta pat mung pru nga ai. Pat mung reng ai, kaja ai, tsawm ai re. Tsawm u-ga, myit su hpraw hpru ai kashu kasha ni rai u ga ngu nna jiwa ni pat hte mung, masha mying shamying ya nga ai. “La Pat, Roi Pat” nga nna shamying ai ni law law  nga ai.

Nta Htingnu Mying Shamying Ai Lam

Nta Htingnu hpe mung masha mying shamying lang nga ga ai. Jan ja tim, marang htu tim ahkying aten n lata nna shingbyi nga ra ai.Shadu lu shadu sha ra ai. Manu dan di kai Jinghpaw Wunpawng amyu sha ni a (5) dap6,7,8,9,10 dap galu ren htingnu ni hpe gap rawng nna Lamu Madai jaw sha ai. Ju manau dum sha ai, dawhpum dawnu kaba ni jung nna gap rawng ga ai. Madai garap ni galaw da, dawhpum dawnu ni kaw gaw Nga, Uloi rung ni magawng htep htep shakap da nga ga ai. Nta ningnan moi manau dum sha ai. Kaja ai wunli la nna masha mying hpe Htingnu Gam, Htingnu Naw, Htingnu La nga nna shamying lang nga ga ai.

Manau Mying Shamying Ai Lam.

Manau, mung  gumhkawng ai masha law law 100 lam, 1000 lam woi awn nna manau nau ai rai nga ai. Mungkan hta mung danhkung dandawng nga ai, tsawm htap kaja ai lam ni re majaw, anhte Jinghpaw ni Manau Tu ngu nna mying shamying jang kaja ai wunli lu galu kaba lam re majaw ma mying shamying ai shaloi jai lang ai lam rai nga ai.

 

Magwi Hte Mying Shamying Ai Lam

Magwi a mying hte mung, masha mying, ma mying ni hpe shamying ya nga ga ai. Magwi Naw, Magwi Gum Zau, Magwi La ngu nna mying shamying ya nga ga ai. Masha amyu htinggaw mying mung Magwi ni ngu ai nga ma ai. Magwi gaw dusat dumyeng yawng hta kaba dik re ai. Ninggun ja dik ai amyu langai mi rai nga ai.

Mai lung adun mung grai ngut ai. Shadaw dawhpum ni mung adun ngut ai. Reng dik ai, lungseng ni mung grai htaw lu ai. Ninggun ja dik dusat amyu langai mi rai nga ai.

Shinggyim masha ni, Magwi hpe rim asawng la nna, shapu sharin la, shangun lang nga ai. Magwi gaw bungli awngdang akyu pru nga ai. Manu grai dan reng ai. Sen latsa lam hti nna rim la dut sha nga ma ai. Du sat amyu hta kaba dik amyu langai mi rai nga ai.

Magwi kawng mung grai manu dan nga ai;-Sen (10), sen (100) sen (100) lam kahtap nna dut sha ma ai. Dum nta kaw shatsawm da ting grai shingkang nga ai.

Anhte Jinghpaw chyurum ai Wunpawng amyusha ni gaw, shata (12) ma gun nna shangai ai ma hpe mung, magwi mying jaw ai Magwi mung shata (12) gun nna, shangai ai re majaw, Magwi mying hte mung ma mying shamying ya nga ga ai. Tinang a kashu kasha ni hpe grai ninggun ja ai grai magrau grang galu kaba tsawm htap nga u ga, kaja grau ai hpe jai lang chye nga ma ai.

Bum Hte Mying Shamying Ai Lam

Bum mying hte mung ma mying shamying nga ga ai. Bum kaba bum tsaw, bum maling ni hte mung, ma mying masha mying hpe, jiwa ni shamying ya nga ma ai. Ya anhte ni a prat hta mung ginlen lang nga ga ai. Ma “ Mying hpe, Bum Ring Bum Tsaw…Bum Nawng, Bum Len ngu nna shamying nga ga ai.

Bum ni gaw kaba ai, bum tsaw bum shagawng, bum nem bum yan ni shinggrup gawan tsawm htap nga ai. Tsit lali tsawm ai Bum tsaw ntsa kaw nna, mada dat yu jang, shara shagu mu lu nga ai.Nampu nampan ni yawng hpe, mu mada grai dawng nga ai. Sa! Ra ni hpe galaw da hkring sa marit shamai ya lu nga ai.

Bum ntsa kaw nna, sumru dat yu jang, marit maroi sumru yu nna mahkawn yungwi ninghkring ni mung, grai grai pyaw ai mahkawn ni hpe htuk mahkawn shapoi ya nga ma ai.

Nampan Hte Ma Mying Shamying Ai Lam

Nampan hte mung ma mying shamying ya nga ga ai. Pan Tsun, Ma Pan,Seng Pan, Htoi Pan, ngu nna shamying ya nga ga ai.Nampan tsawm ai, manam pyaw ai nampan ni hpe n yu nna,n magra!, n masawp, n di ,n manam nna kadai n nga lu ai. Masha myit hpe shapyaw shanpyaw  ya lu nga ai. Manam sama lu  ai hte hpa baw nampan re chye sai. Nampan tsawm mu ai hte mying pyaw nga lu ai. Asak hpe galu jat na daram nampan atsam n-gun rawng nga ai.

Bau Hte Ma Mying Shamying Ai Lam

Dum lang ai Bau hte mung ma mying shamying ya chye ga ai. Bau gaw grai ngoi pyaw ai, mahku grai sa ai amyu re. Anhte Jinghpaw chyurum amyusha ni gaw, manau nau ai shaloi dum ai, masha si kabung dum bau gindawng shangwi shapyaw ya ai.

Bau mahku ngoi ai hte masha yawng hpe myit jasu sharawt ya lu ai. Bau ngoi na ai hte,masha yawng kanawn shamu shamawt mayu nga ai. Dai majaw kaja ai kasi ningli la ai lam rai nga ai. Bau ngoi ai zawn, zet kung u ga ngu nna,Ma mying hpe mung, Kaw Bau, Ja Bau,Naw Bau ngu nna shamying ya ga ai. Jiwa ni gaw kaja ai lailen ni hpe ginlen lang nga ma ai.

Ja hte Ma Mying Shamying ai lam.

Ja hte mung ma mying shamying ya nga ga ai. Ja Tawng Naw, Ja Awng, Ja Tawng , Ja Brim, Ja Seng, Ja Ban ngu nna shamying ya. Ja hpe pali zawn di nna galaw lang mai ai. Ja gaw reng htum ngu tim n shut ai. Dai ni, hpawt ni na manu hte ja hpe loi loi hte dut lu nga ai.

Arung a rai  kaga amyu ni gaw ra ai wa, ra ai hku jaw ai. Aloi sha n dut lu ai. Grau reng ai, grau manu hpu ai raitim dut sha yak ai. Ja hpe n ra ai masha n nga ai. Masha shagu hpe,ja shakap mawn sumli jang, grau dan hkung shangun nga ai. Grau tsawm shangun ai, shinggyim masha shagu gaw hkum hkrang, lagaw, lata ,na, yawng hpe shatsawm jat ya nga ai. Ja hpe shareng nna shinggyim masha ni yawng jai lang madu da ai hpe mu lu nga ga ai.

 

 

Leave a Reply

Your email address will not be published.